Neni 111. Saktësia e informacionit të repertorit shumë-territorial

1. Organizata e menaxhimit kolektiv e cila jep licenca shumë-territoriale për të drejtat në veprat muzikore në internet, është e obliguar të ketë mekanizma për t’u mundësuar bartësve të të drejtave, organizatave të tjera të menaxhimit kolektiv dhe ofruesve të shërbimeve në internet, të kërkojnë korrigjimin e të dhënave të përmendura në listën e kushteve sipas Nenit 109 paragrafit

2. të këtij ligji, ose informacionit të dhënë sipas nenit 110 të këtij ligji, kur këta bartës të të drejtave, organizatat e menaxhimit kolektiv dhe ofruesit e shërbimeve në internet, në bazë të provave të arsyeshme, besojnë se të dhënat ose informacioni janë të pasakta në lidhje me të drejtat e tyre në vepra muzikore në internet. Kur pretendimet janë të vërtetuara mjaftueshëm, organizata e menaxhimit kolektiv është e obliguar të sigurojë që të dhënat ose informacioni të korrigjohen pa vonesa të panevojshme.

2. Organizata e menaxhimit kolektiv është e obliguar t’u sigurojë titullarëve veprat muzikore të të cilëve janë përfshirë në repertorin e saj muzikor dhe bartësve të të drejtave të cilët ia kanë besuar menaxhimin e të drejtave të tyre në veprat muzikore në internet, në pajtim me nenin 116 të këtij ligji, mjetet për t’i dorëzuar organizatës në formë elektronike, informacion në lidhje me veprat e tyre muzikore, të drejtat e tyre në ato vepra dhe territoret në lidhje me të cilat mbajtësit e të drejtave autorizojnë organizatën. Kur e bëjnë këtë, organizata e menaxhimit kolektiv dhe bartësit e të drejtave do të marrin parasysh, për aq sa është e mundur, standardet ose praktikat vullnetare të industrisë në lidhje me shkëmbimin e të dhënave të zhvilluara në nivel ndërkombëtar, duke i lejuar bartësit e të drejtave të specifikojnë veprën muzikore, tërësisht ose pjesërisht, të drejtat në internet, tërësisht ose pjesërisht, dhe territoret në lidhje me të cilat ata autorizojnë organizatën.

3. Kur organizata e menaxhimit kolektiv e mandaton një organizatë tjetër të menaxhimit kolektiv, që të japë licenca shumë-territoriale për të drejtat në internet në veprat muzikore sipas neneve 114 dhe 115 të këtij ligji, organizata e mandatuar për menaxhim kolektiv do të zbatojë edhe paragrafin 2. të këtij neni në lidhje me mbajtësit e të drejtave, veprat muzikore të të cilëve përfshihen në repertorin e organizatës mandatuese të menaxhimit kolektiv, përveç rasteve kur organizatat e menaxhimit kolektiv bien dakord ndryshe.