Neni 108. Raporti vjetor i transparencës

1. Organizata e menaxhimit kolektiv është e obliguar të hartoj dhe të bëjë publik raportin vjetor të transparencës, përfshirë raportin e posaçëm nga paragrafi 3. i këtij neni, për çdo vit financiar, jo më vonë se tetë (8) muaj pas përfundimit të atij viti financiar. Organizata e menaxhimit kolektiv publikon në faqen e saj të internetit raportin vjetor të transparencës, i cili duhet të mbetet i disponueshëm për publikun në atë faqe interneti për të paktën pesë (5) vjet.

2. Raporti vjetor i transparencës duhet të përmbajë së paku informacionin e mëposhtëm:

2.1. pasqyrat financiare që përfshijnë një bilanc ose një pasqyrë të aktiviteteve dhe detyrimeve, një deklarim të të ardhurave dhe shpenzimeve për vitin financiar dhe një pasqyrë të rrjedhës së parasë;

2.2. një raport mbi aktivitetet në vitin financiar;

2.3. informacion mbi refuzimet për të dhënë licencë sipas nenit 101 paragrafi 3. të këtij ligji;

2.4. një përshkrim të strukturës ligjore dhe qeverisëse të organizatës së menaxhimit kolektiv;

2.5. informacion mbi çdo subjekt që është në pronësi ose kontroll të drejtpërdrejtë ose të tërthortë, tërësisht ose pjesërisht, nga organizata e menaxhimit kolektiv;

2.6. informacion për shumën totale të shpërblimit të paguar për personat e përmendur në nenin 94 paragrafin 4. të këtij ligji dhe për personat të cilët drejtojnë organizatën për vitin paraprak, dhe për përfitimet e tjera të dhëna atyre;

2.7. informacionin financiar të mëposhtëm:

2.7.1. informacion financiar mbi të ardhurat e të drejtave, për kategori të të drejtave të menaxhuara dhe për llojet e përdorimit (p.sh. transmetimi, në internet, interpretimi publik), duke përfshirë informacionin mbi të ardhurat që rrjedhin nga investimi i të ardhurave nga të drejtat dhe përdorimi i të ardhurave të tilla (nëse ai u shpërndahet bartësve të të drejtave ose organizatave të tjera të menaxhimit kolektiv, ose përdoret ndryshe);

2.7.2. informacion financiar mbi koston e menaxhimit të të drejtave dhe shërbimeve të tjera të ofruara nga organizata e menaxhimit kolektiv për bartësit e të drejtave, me një përshkrim të plotë të të paktën gjërave në vijim:

2.7.2.1. të gjitha kostot operative dhe financiare, të ndara për kategori të të drejtave të menaxhuara dhe, kur kostot janë indirekte dhe nuk mund t’i atribuohen një ose më shumë kategorive të të drejtave, një shpjegim i metodës së përdorur për shpërndarjen e këtyre kostove indirekte;

2.7.2.2. kostot operative dhe financiare, të ndara sipas kategorisë të së drejtave të menaxhuara dhe, kur kostot janë indirekte dhe nuk mund t’i atribuohen një ose më shumë kategorive të të drejtave, një shpjegim i metodës së përdorur për shpërndarjen e këtyre kostove indirekte, vetëm në lidhje me menaxhimin e të drejtave, duke përfshirë tarifat e menaxhimit të zbritura ose të kompensuara me të ardhurat e të drejtave ose çdo të ardhur që rrjedh nga investimi i të ardhurave nga të drejtat; 2.7.2.3 kostot operative dhe financiare në lidhje me shërbimet e tjera përveç menaxhimit të të drejtave, por duke përfshirë shërbimet sociale, kulturore dhe arsimore;

2.7.2.4. burimet e përdorura për të mbuluar kostot;

2.7.2.5. zbritjet e bëra nga të ardhurat e të drejtave, të ndara sipas kategorisë së të drejtave të menaxhuara dhe sipas llojit të përdorimit dhe qëllimit të zbritjes, të tilla si kostot që lidhen me menaxhimin e të drejtave ose me shërbimet sociale, kulturore ose arsimore;

2.7.2.6. përqindjet që përfaqëson kostoja e menaxhimit të të drejtave dhe shërbimeve të tjera të ofruara nga organizata e menaxhimit kolektiv për mbajtësit e të drejtave, në krahasim me të ardhurat e të drejtave në vitin përkatës financiar, për kategorinë e të drejtave të menaxhuara, dhe kur kostot janë indirekte dhe nuk mund që ti atribuohen një ose më shumë kategorive të të drejtave, një shpjegim i metodës së përdorur për shpërndarjen e këtyre kostove indirekte.

2.7.3. informacion financiar mbi shumat që u detyrohen bartësve të së drejtave, me një përshkrim të plotë si në vijim:

2.7.3.1. shumën totale që i atribuohet bartësve të së drejtave, me një ndarje për kategorinë e të drejtave të menaxhuara dhe llojin e përdorimit;

2.7.3.2. shumën totale të paguar për mbajtësit e të drejtave, me një ndarje për kategorinë e të drejtave të menaxhuara dhe llojin e përdorimit;

2.7.3.3. shpeshtësinë e pagesave, me një ndarje sipas kategorisë së të drejtave të menaxhuara dhe sipas llojit të përdorimit;

2.7.3.4. shumën totale të mbledhur, por që ende nuk i është atribuuar bartësve të të drejtave, me një ndarje për kategorinë e të drejtave të menaxhuara dhe llojin e përdorimit, duke treguar vitin financiar në të cilin janë mbledhur ato shuma;

2.7.3.5. shumën totale që i atribuohet por nuk është shpërndarë ende te bartësit e të drejtave, me një ndarje për kategorinë e të drejtave të menaxhuara dhe llojin e përdorimit, dhe duke treguar vitin financiar në të cilin janë mbledhur ato shuma;

2.7.3.6. nëse organizata e menaxhimit kolektiv nuk e ka kryer shpërndarjen dhe pagesat në afatin e caktuar me këtë Ligj, duhet dhënë arsyet për vonesën;

2.7.3.7. shumat totale të pashpërndara, së bashku me një shpjegim të përdorimit për të cilin janë përdorur këto shuma.

2.7.4. informacion në lidhje me marrëdhëniet me organizatat e tjera të menaxhimit kolektiv, me një përshkrim si në vijim:

2.7.4.1. shumat e marra nga organizata e tjera të menaxhimit kolektiv dhe shumat e paguara organizatave të tjera të menaxhimit kolektiv, me ndarje sipas kategorive të të drejtave, për llojin e përdorimit dhe për organizatën përkatëse;

2.7.4.2. tarifat e menaxhimit dhe zbritjet e tjera nga të ardhurat e të drejtave për organizatat e tjera të menaxhimit kolektiv, me një ndarje për kategori të të drejtave, për llojin e përdorimit dhe për organizatë përkatëse;

2.7.4.3. tarifat e menaxhimit dhe zbritjet e tjera nga shumat e paguara nga organizatat e tjera të menaxhimit kolektiv, me një ndarje për kategorinë të të drejtave dhe për organizatën përkatëse; 2.7.4.4 shumat e shpërndara drejtpërdrejtë te mbajtësit e të drejtave me origjinë nga organizatat e tjera të menaxhimit kolektiv, me një ndarje për kategorinë e të drejtave dhe për organizatën përkatëse.

2.8. një raport të veçantë për përdorimin e çdo shume të zbritur për qëllime të shërbimeve sociale, kulturore dhe arsimore.

3. Raporti i veçantë i përshkruar në nën-paragrafin 2.8. të këtij neni, duhet të trajtojë përdorimin e shumave të zbritura për qëllime të shërbimeve sociale, kulturore dhe arsimore dhe do të përmbajë së paku informacionin e mëposhtëm:

3.1. shumat e zbritura për qëllime të shërbimeve sociale, kulturore dhe arsimore në vitin financiar, me një ndarje për llojin e qëllimit dhe për çdo lloj qëllimi, me një ndarje për kategorinë e të drejtave të menaxhuara dhe për llojin e përdorimit;

3.2. një shpjegim të përdorimit të këtyre shumave, me një ndarje sipas llojit të qëllimit, duke përfshirë kostot e menaxhimit të shumave të zbritura për financimin e shërbimeve sociale, kulturore dhe arsimore dhe të shumave të veçanta të përdorura për shërbimet sociale, kulturore dhe arsimore.

4. Të dhënat kontabël të përfshira në raportin vjetor të transparencës, kontrollohen nga një ose më shumë persona të autorizuar me ligjin për auditimin e llogarive. Raporti i auditimit, duke përfshirë çdo kualifikim për të, do të përfshihet si i plotë në raportin vjetor të transparencës. Për qëllimet e këtij paragrafi, informacioni kontabël, përmban pasqyrat financiare të përmendura në nën-paragrafin 2.1. të këtij neni dhe çdo informacion financiar të përmendur në nën-paragrafët

2.7. dhe 2.8. të këtij neni. NËNKAPITULLI VIII LICENCIMI SHUMË-TERRITORIAL I TË DREJTAVE NË INTERNET PËR VEPRAT MUZIKORE NGA ORGANIZATAT E MENAXHIMIT KOLEKTIV