Neni 81. Të drejtat dhe detyrimet e përdoruesve të ligjshëm të bazave të të dhënave

1. Prodhuesi i bazës së të dhënave e cila vihet në dispozicion të publikut në çfarëdo mënyre, nuk mund të pengojë një përdorues të ligjshëm të bazës së të dhënave të nxjerrë dhe/ose të ripërdorë pjesë jo thelbësore të përmbajtjes së saj, të vlerësuara në mënyrë cilësore dhe/ose sasiore, për çfarëdo qëllimi qoftë. Kur përdoruesi i ligjshëm është i autorizuar të nxjerrë dhe/ose të ripërdor vetëm një pjesë të bazës së të dhënave, ky paragraf do të zbatohet vetëm për atë pjesë. Çdo dispozitë në kundërshtim me këtë paragraf është e pavlefshme dhe nule.

2. Përdoruesi i ligjshëm i bazës së të dhënave, e cila është vënë në dispozicion të publikut në çfarëdo mënyre, nuk mund të kryejë veprime që bien ndesh me shfrytëzimin normal të bazës së të dhënave ose që cenon në mënyrë të paarsyeshme interesat legjitime të prodhuesit të bazës së të dhënave.

3. Përdoruesi i ligjshëm i bazës së të dhënave, e cila është vënë në dispozicion publikut në çfarëdo mënyre, nuk mund t’i shkaktojë dëm bartësit të së drejtës së autorit ose të drejtave të përafërta, në lidhje me veprat ose objektet e tjera të mbrojtura që gjenden në bazën e të dhënave.